Persónuvernd

1. Hvaða upplýsingum við söfnum

Innskráning: þegar þú skráir þig inn með rafrænum skilríkjum fáum við nafn, kennitölu, símanúmer og netfang frá Kenni. Vanti netfangið biðjum við þig um það. Nýtt netfang sem þú skrifar hjá okkur tekur ekki gildi fyrr en þú staðfestir það með tengli sem við sendum á það, og á meðan er það ekki notað í annað. Við fáum aldrei skilríkin sjálf né PIN-númer.

Uppboð og kaup: boð og hámarksboð sem þú leggur fram, hvenær þau bárust, hvaða verk þau tilheyra og IP-talan sem þau komu frá. Reikningar og greiðslur sem verða til við kaup. Við beina sölu gefur þú líka upp netfang og símanúmer fyrir reikninginn.

Verk sem þú sendir inn: upplýsingar um verkið, myndir af því og samskipti okkar um það.

Seljendur: kennitala, heimilisfang, símanúmer og bankareikningur vegna útborgunar. Starfsfólk skráir þetta.

Prófílmynd og vaktlisti: myndin sem þú bætir við og verkin sem þú setur á vaktlistann.

Póstlisti: netfangið þitt, ef þú skráir þig, og hvar á vefnum þú skráðir þig.

Skilaboð til okkar: skrifir þú okkur í tölvupósti, á Messenger eða á Instagram er samtalið geymt í innhólfi stjórnborðsins, ásamt svörunum okkar. Þar eru nafnið þitt eða notendanafn, netfangið (í pósti), efnislína, texti skeytanna og tímasetningar, nöfn viðhengja (hjá Meta einnig slóð á skrána, sem rennur út eftir nokkra daga), auðkenni samtalsins og skeytanna hjá Google og Meta, og hvaða starfsmaður svaraði. Viðhengin sjálf eru ekki geymd í innhólfinu. Þegar skeyti berst fá starfsmenn tilkynningu í appið með nafni, netfangi eða notendanafni sendandans, ekki textanum.

Drög að svari: þegar starfsmaður opnar samtal þar sem nýjasta skeytið er frá þér og ósvarað semur gervigreind drög að svari. Drögin eru geymd í innhólfinu með samtalinu. Starfsmaður les þau, breytir þeim og sendir sjálfur, gervigreindin sendir aldrei neitt.

Spjallið á vefnum: spjallhnappurinn opnar spjall þar sem gervigreind svarar fyrst. Það sem þú skrifar fer til Anthropic svo hún geti svarað (sjá 4. kafla). Við geymum ekkert af spjalli sem er bara við gervigreindina, aðeins fjölda tákna (token) sem svörin nota, aldrei textann. Ýtir þú á „Tala við manneskju“ vistast allt spjallið til þessa í innhólfi stjórnborðsins, ásamt nafni og netfangi ef þú gefur þau upp, en hvort tveggja er valfrjálst. Þar les starfsmaður það og svarar, og skeytin eftir það eru geymd í innhólfinu. Til að verjast misnotkun geymir spjallið stutt brot af ólæsilegu gildi (hash) úr IP-tölunni þinni, reiknuðu með lykli sem breytist á hverjum degi. Brotið er aðeins notað til að telja fyrirspurnir. Því er eytt úr gagnagrunninum innan fárra klukkustunda, en það getur verið áfram í afritum hans, sjá 5. kafla. Sjálf IP-talan er ekki geymd af spjallinu.

Tæknilegar upplýsingar: IP-tala, gerð vafra og tíminn þegar beiðnin barst. Þetta verður til við hverja heimsókn á hvaða vef sem er og er notað til að halda vefnum uppi og öruggum.

Appið: appið er skel utan um vefinn, svo allt sem hér stendur gildir líka um það. Það biður um aðgang að myndavél og myndasafni þegar þú bætir við mynd af verki eða prófílmynd, og við fáum aðeins myndirnar sem þú velur. Það les hvorki staðsetningu né tengiliði. Ef þú leyfir tilkynningar geymum við auðkenni símans hjá Firebase (token), hvort hann er iPhone eða Android, útgáfu appsins og hvenær hann skráði sig síðast. Þú getur slökkt á tilkynningum í stillingum símans, og valið hvað þú færð undir Stillingar á vefnum.

2. Af hverju við notum þær og á hvaða grundvelli

Til að efna samninginn við þig: taka við boðum, slá verk, gefa út reikninga, taka við greiðslum og afhenda verk. Án þessara upplýsinga er ekki hægt að versla hér.

Vegna lagaskyldu: bókhald og reikningar, og skil á fylgiréttargjaldi til Myndstefs.

Vegna lögmætra hagsmuna: að halda vefnum uppi, verjast misnotkun, finna villur og telja heimsóknir, svara þeim sem skrifa okkur í pósti, á Messenger, á Instagram eða í spjallinu á vefnum (líka með drögum sem starfsmaður les og sendir sjálfur, og með gervigreind í spjallinu), og geta rakið hvað gerðist þegar eitthvað fer úrskeiðis, til dæmis með IP-tölunni sem fylgir hverju boði.

Á grundvelli samþykkis: póstlistinn, mælingarkakan frá Meta og tilkynningar í símann. Allt þetta má afturkalla hvenær sem er, og það hefur engin áhrif á það sem á undan er gengið.

3. Vafrakökur og mælingar

Nauðsynlegar kökur: innskráningin geymir köku sem heldur þér inni í allt að sjö daga frá síðustu heimsókn á vefnum og þrjátíu daga í appinu. Við fyrstu heimsókn setur vefurinn auk þess tvær kökur frá innskráningarkerfinu, öryggiskóða og slóðina sem þú ferð á eftir innskráningu, og þær hverfa þegar þú lokar vafranum. Þær eru forsenda þess að vefurinn virki og fyrir þeim er ekki beðið um samþykki.

Villur og notkun: við notum PostHog til að finna villur og hnappa sem virka ekki. Það skráir smelli og flettingar og tekur upp hvernig síðan hreyfist. Texti og allt sem þú slærð inn verður að stjörnum í upptökunni. Slóðir, lýsingartextar á myndum og hnöppum og skilaboð úr villuskrá vafrans eru ekki falin, og slóðin ber leitarorð ef þú leitar. IP-tölunni er hent, en borgin og póstnúmerið sem PostHog les úr henni fylgja hverjum atburði. Engin kaka er sett og gesturinn er ekki auðkenndur, svo PostHog veit ekki hver þú ert. Upptökur eru geymdar í 30 daga og gögnin innan EES.

Heimsóknir: Vercel Web Analytics telur heimsóknir og flettingar, með slóð, vísandi vef, landi, vafra og tæki. Það setur enga köku og rekur þig ekki milli vefsíðna.

Mælingarkaka frá Meta: við notum Meta-pixilinn til að sjá hvaða auglýsingar á Facebook og Instagram skila fólki inn á vefinn. Hann sendir Meta hvaða síður og verk þú skoðar og hvort þú setur verk á vaktlistann, skráir þig sem bjóðanda, leggur fram boð eða hámarksboð, byrjar eða klárar kaup, sendir inn verk, skráir þig á póstlistann eða hefur samband. Titill verks, nafn listamanns og upphæð fylgja þar sem það á við, ásamt IP-tölu og auðkenni vafrans.

Pixillinn hleðst ekki fyrr en þú hefur samþykkt hann. Hafir þú hafnað honum, eða ekki svarað, er engin skrá frá Meta sótt inn á síðuna. Í appinu hleðst hann aldrei.

Meta er sjálfstæður ábyrgðaraðili að því sem það fær með þessum hætti. Upplýsingar um vinnsluna eru í gagnastefnu Meta á facebook.com/privacy/policy.

Svarið þitt er geymt í vafranum þínum, ekki hjá okkur, og þú getur breytt því hér að neðan hvenær sem er. Vafrinn geymir líka að þú lokaðir póstlistaglugganum (í 30 daga), ábendingu í þrívíddarsalnum og spjallið á vefnum, og drög að innsendingu verks á meðan flipinn er opinn.

Spjallið: vafrinn geymir auðkenni spjallsins og það sem þú og gervigreindin hafið sagt, svo spjallið haldist þótt þú hlaðir síðuna aftur. Á meðan þú talar bara við gervigreindina er spjallið aðeins þar, ekki hjá okkur. Texti spjallsins fer hvorki í PostHog, Meta-pixilinn né Vercel Web Analytics.

4. Hverjir vinna upplýsingarnar fyrir okkur

Við seljum engar persónuupplýsingar. Til að reka vefinn og appið notum við eftirfarandi þjónustur, sem vinna upplýsingar fyrir okkar hönd:

Kenni: rafræn skilríki og innskráning. Supabase: gagnagrunnurinn og myndirnar, í Írlandi. Vercel og Cloudflare: hýsing vefsins og uppboðskerfisins. Vercel telur líka heimsóknir, án köku. Payday: reikningar og kröfur. Þangað fara kennitala, nafn og netfang kaupanda og lýsing á verkinu. SendGrid: tölvupóstur. Twilio: SMS. Firebase (Google) og Apple: tilkynningar í appið. Auðkenni símans og texti tilkynningarinnar fer um þjónustur þeirra. Sentry: villuskráning, án IP-talna og kakna. PostHog: villur og notkun vefsins, án köku. Anthropic: gervigreindartól fyrir starfsfólk í stjórnborðinu, drög að svörum í innhólfinu og gervigreindin í spjallinu á vefnum. Google: pósthólfið okkar (Google Workspace), þar sem pósturinn til okkar liggur. Innhólfið sækir hann þaðan og sendir svörin þangað. Meta: Messenger og Instagram, þegar þú skrifar okkur þar, og mælingarkakan, hafir þú samþykkt hana.

Gervigreindartólið í stjórnborðinu er aðeins fyrir starfsfólk. Þegar það er notað fara spurningin og það sem tólið sækir til Anthropic, svo sem nafn, netfang og símanúmer notenda. Tólið sækir aldrei kennitölu, bankareikning né IP-tölu.

Drög að svari við skeyti til okkar eru samin af gervigreind hjá Anthropic. Þá fara síðustu skeyti samtalsins (allt að tuttugu, með texta, tímasetningu og hvort skeytið var frá þér eða okkur), nafnið á þeim sem skrifaði og efnislínan til Anthropic, ásamt algengum spurningum af vefnum. Netfangið eða notendanafnið sem er skráð við samtalið og viðhengin sjálf fara ekki með, en allt sem stendur í skeytunum fer með. Skrifir þú okkur í tölvupósti af netfangi sem er skráð á aðgang hjá okkur fara líka með verkin sem aðgangurinn hefur unnið á uppboði eða keypt: heiti verks, listamaður, uppboð og númer lotu, hvort verkið sé greitt og sótt, síðasti dagur til að sækja það, og flutningsaðili og sendingarnúmer ef það var sent. Upphæðir, kennitala og greiðsluupplýsingar fara ekki með. Drögin eru tillaga: starfsmaður les þau, breytir og sendir sjálfur, og gervigreindin sendir aldrei skeyti. Við skráum í breytingaskrána hver bað um drög og í hvaða samtali, ekki textann.

Spjallið á vefnum er gervigreind hjá Anthropic. Skilaboðin sem þú sendir í það fara til Anthropic svo hægt sé að semja svörin. Þau eru ekki geymd hjá okkur nema þú biðjir um manneskju, sjá 1. kafla.

Sumar þessara þjónusta eru reknar utan Evrópska efnahagssvæðisins. Flutningur þangað byggir á stöðluðum samningsákvæðum framkvæmdastjórnar Evrópusambandsins.

Hjá okkur sér starfsfólk með stjórnandaaðgang upplýsingar um notendur í stjórnborðinu, þar á meðal kennitölu, og IP-tölu á boðum. Aðrir bjóðendur sjá ekki hver býður. Boðasagan sýnir upphæð, tíma og númer bjóðanda, og númerið gildir bara á þeirri lotu.

Að auki afhendum við upplýsingar þegar okkur ber lagaskylda til, svo sem til skattyfirvalda. Skýrslan til Myndstefs vegna fylgiréttargjalds hefur nöfn listamanna, verk og söluverð, ekki upplýsingar um kaupendur eða seljendur.

5. Hversu lengi upplýsingarnar eru geymdar

Reikningar og annað bókhaldsgagn eru geymd í að minnsta kosti sjö ár frá lokum viðkomandi reikningsárs, sbr. lög nr. 145/1994 um bókhald.

Boð og uppboðssaga eru ekki eydd. Þau eru hluti af sögu uppboðs sem aðrir eiga hlut í, og IP-talan sem samþykkt boð komu frá fylgir þeim.

Upptökur í PostHog eru geymdar í 30 daga.

Samtöl í innhólfinu (póstur, Messenger, Instagram og spjallið á vefnum) eru eydd sjálfkrafa þegar 24 mánuðir eru liðnir frá síðasta skeyti í samtalinu. Eyðingin keyrir einu sinni á dag. Drögin að svörum eyðast með samtalinu. Pósturinn sjálfur liggur líka í pósthólfinu okkar hjá Google, þar sem honum er ekki eytt sjálfkrafa, og Meta geymir samtöl á Facebook-síðunni og Instagram-reikningnum eftir eigin reglum. Biðjir þú um eyðingu eyðum við samtalinu úr innhólfinu og póstinum úr pósthólfinu okkar.

Spjallið á vefnum: spjall sem er bara við gervigreindina er ekki geymt hjá okkur. Hafir þú beðið um manneskju fer spjallið í innhólfið og eyðist þaðan eins og önnur samtöl, þegar 24 mánuðir eru liðnir frá síðasta skeyti. Brotið af IP-tölunni sem spjallið notar gegn misnotkun er eytt úr gagnagrunninum innan fárra klukkustunda. Dulkóðuðu daglegu afritin af gagnagrunninum geta þó haldið því þar til þau eru eydd, en 30 nýjustu afritin eru geymd.

Þegar þú eyðir aðganginum eyðum við líka tölvupóstsamtölum í innhólfinu við netfangið á honum, með öllum skeytum í þeim. Þá eyðist afritið í innhólfinu en pósturinn sjálfur í pósthólfinu okkar hjá Google er ekki snertur. Samtöl á Messenger og Instagram eyðast ekki með aðganginum, því í þeim er ekkert netfang sem tengir þau við hann. Þau eyðast eins og önnur samtöl þegar geymslutíminn er liðinn, eða þegar þú biður um það, sjá 6. kafla. Skrifaðir þú okkur frá öðru netfangi en því sem er á aðganginum eyðist það samtal ekki heldur. Spjall á vefnum eyðist ekki heldur með aðganginum, því netfangið í því er valfrjálst og þarf ekki að vera það sama og á aðganginum.

Auðkenni símans fyrir tilkynningar er geymt þar til aðgangi er eytt. Þegar þú skráir þig út í appinu tökum við símann af listanum og ekkert er sent á hann.

Aðgangurinn þinn stendur þar til þú eyðir honum. Þú getur eytt honum í appinu og á vefnum (Mín síða, Stillingar, Eyða aðgangi), svo framarlega sem ekkert er ógreitt eða ógert upp. Hvernig aðgangi er eytt stendur líka á uppbodshusid.is/eyda-adgangi, og þar þarf ekki að skrá sig inn.

Þegar aðgangi er eytt fjarlægjum við nafn, kennitölu, netfang, símanúmer, prófílmynd, vaktlista, tæki sem eru skráð fyrir tilkynningar, seljandaupplýsingar, netfangið á póstlistanum og innsendingar sem hafa ekki verið samþykktar. Boð, reikninga, greiðslur, útborganir, verk og samþykktar innsendingar geymum við áfram. Nafn og kennitala standa áfram á kröfum sem hafa verið sendar og á reikningum fyrir beina sölu. Breytingaskrá stjórnborðsins geymir líka áfram afrit af því sem starfsfólk skráði um seljanda eða innsendingu.

Netfang á póstlistanum er notað þar til þú afskráir þig, og í hverjum pósti er hlekkur til þess. Eftir afskráningu helst netfangið í skránni merkt sem afskráð, þar til þú biður um að það sé fjarlægt.

6. Réttindi þín

Þú átt rétt á að fá að vita hvaða upplýsingar við geymum um þig og fá afrit af þeim.

Þú átt rétt á að láta leiðrétta rangar upplýsingar.

Þú átt rétt á að láta eyða upplýsingum sem okkur er ekki skylt að geyma, andmæla vinnslu og óska eftir að hún sé takmörkuð. Þú getur eytt aðganginum þínum í appinu og á vefnum, sjá 5. kafla. Þá eyðast tölvupóstsamtöl við netfangið á honum líka. Samtöl á Messenger og Instagram, spjall á vefnum og samtöl frá öðru netfangi eyðast ekki með honum, svo beiðni um að þeim sé eytt berst á info@uppbodshusid.is. Nefndu netfangið eða nafnið sem þú skrifaðir frá. Úr spjalli á vefnum: nafnið eða netfangið sem þú gafst upp, eða hvenær þú talaðir við okkur og um hvað.

Þú átt rétt á að fá upplýsingar sem þú lést okkur í té á því formi að þær megi flytja annað.

Þú getur afturkallað samþykki hvenær sem er, hvort sem það snýr að póstlistanum, mælingarkökunni eða tilkynningum.

Beiðni berst á info@uppbodshusid.is og við svörum innan mánaðar. Teljir þú að við förum illa með upplýsingarnar þínar getur þú kvartað til Persónuverndar, personuvernd.is.

8. Breytingar á stefnunni

Stefnan getur breyst, til dæmis ef við bætum við þjónustu eða mælingu. Sé breytingin veruleg biðjum við um samþykki upp á nýtt í stað þess að treysta á það gamla.